ഒരു കുട്ടി, അഞ്ച്- ആറ് വയസ്സുള്ള കുട്ടി, ഒരു ദിവസം എത്ര ചോദ്യങ്ങള്‍ ചോദിക്കുമായിരിക്കും?
ഉത്തരമുള്ളതും ഉത്തരം അറിയാത്തതും, ഉത്തരം ഇല്ലാത്തതുമായ അനവധി ചോദ്യങ്ങള്‍ ഈ പ്രായത്തില്‍ കുട്ടികള്‍ ചോദിച്ച് മുതിര്‍ന്നവരെ ‘ബുദ്ധി’മുട്ടിയ്ക്കാറുണ്ട്.
ഒരു ചോദ്യത്തില്‍ നിന്ന് മറ്റൊരു ചോദ്യത്തിലേക്ക് ഒരൊഴുക്കാണ്...
മിക്കപ്പോഴും അടിയും വാങ്ങി ചിണുങ്ങിയാവും ഇതിന്റെ അവസാനം!
ഇനിയൊരു മുപ്പത് - മുപ്പത്തഞ്ച് വയസ്സായാല്‍ ഇതേ കുട്ടി ഒരു ദിവസം എത്ര ചോദ്യങ്ങള്‍ ചോദിക്കും?
ഒന്നോ, രണ്ടോ... ഏറിയാല്‍ പത്ത്!
സ്കൂളിലും കോളേജിലും പഠിച്ച്, കാര്യങ്ങളെല്ലാം അറിഞ്ഞ് വിദ്വാനായതു കൊണ്ടായിരിക്കും, അല്ലേ?
യഥാര്‍ത്ഥത്തില്‍ ചോദ്യങ്ങള്‍ ഇല്ലാത്തതല്ല!
മനസ്സില്‍ ചോദ്യങ്ങളുടെ ഒരു കൂമ്പാരം തന്നെയുണ്ടാവും, പക്ഷേ ചോദിക്കില്ല!
നാണക്കേടല്ലേ...
പരിഹാസച്ചിരി കേട്ടാലോ...
അങ്ങനെ ചോദ്യങ്ങള്‍ മനസ്സില്‍ തന്നെ ഒതുങ്ങിപ്പോകുന്നു.
അറിവില്ലെന്നത് വാസ്തവം.
ആ അവസ്ഥയില്‍ നിന്ന് രക്ഷപെടാന്‍ കഴിയാത്തത് ഏറ്റവും വലിയ ദുരന്തം.
പുതിയ ചോദ്യങ്ങള്‍ ചോദിക്കാനും പുതിയ സാധ്യതകള്‍ കാണാനും വേണ്ടത് ധൈര്യവും ഭാവനയുമാണ്‍.
